Анагаахын Шинжлэх Ухааны Үндэсний Их Сургуулийн Дорноговь аймаг дахь салбар Анагаах Ухааны Сургууль энэ жилийн төгсөгчдийн хонхны баяраа зохион байгуулж амьдралын их харгуйд үдэн гаргалаа.
Тус сургууль энэ жил хүний их эмч, сувилагч, эм найруулагч, лабораторийн техникч мэргэжлээр нийт 166 оюутан төгсчээ. 1960-аад оноос хөдөө орон нутагт бүс дундын тодотголтой тусгай мэргэжлийн сургуулиуд байгуулах шийдвэр гарсны дагуу БНМАУ-ын Сайд нарын зөвлөлийн 1962 оны 04-р сарын 18-ны 200 дугаар тогтоолоор Монгол орны зүүн өмнөд хязгаарт орших Дорноговь аймгийн Сайншанд хотод зүүн бүсийн аймгуудыг эх баригч- бага эмч, сувилагчаар хангах чиг үүрэгтэй Монгол улсын эрүүл мэндийн салбарын ууган сургуулиудын нэг Анагаах Ухааны дунд сургууль байгуулагдсан түүхтэй.
Тус сургууль 1991 онд Анагаах ухааны их сургуулийн харъяа Анагаах ухааны коллеж, 1996 онд АУИС-ийн харъяа Анагаах Ухааны Эрдэм Шинжилгээний Сургалтын төв, 1997 онд АУИС-ийн харъяа Анагаах ухааны коллеж, 2004 оноос ЭМШУИС-ийн харъяа Дорноговь аймаг дахь Анагаах Ухааны коллеж, 2010 оноос ЭМШУИС-ийн Дорноговь аймаг дахь салбар сургууль, 2014 оноос АШУҮИС-ийн Дорноговь аймаг дахь Анагаах Ухааны салбар сургууль болтлоо өргөжсөн 61 жилийн түүхтэй сургууль юм.
Өнгөрсөн 61 жилийн түүхэн хугацаанд Дорноговь аймаг дахь Анагаах ухааны сургууль 1337 их эмч, 5062 эх баригч- бага эмч, сувилагч 754 бакалавр сувилагч,151 бакалавр эх багигч, 174 лаборантын техникч, 493 эм найруулагч мэргэжлээр нийт 7971 мэргэжилтэн бэлтгэж зүүн болон төвийн бүсийн аймгуудын боловсон хүчний 80 хувийг хангаад байгаа аж.
Мөн Дорноговийн Ангаахын сургуулийг зорин ирж суралцсанаар энэ нутагтаа үлдэж амьдралын гараагаа эхэлсэн олон зуун төгсөгч байдаг төдийгүй бүс нутгийн хөгжил дэвшил, хүн амын өсөлт, суурьшилд ч тус сургууль тодорхой үүрэг нөлөө үзүүлж иржээ.